2024 ވަނަ އަހަރުގެ މިނިވަންދުވަސް ފާހަގަ ކުރުމުގެ ގޮތުން ދިދަނެގުމުގެ ރަސްމިއްޔާތު ބާއްވައިފި

މި އަހަރުގެ މިނިވަންދުވަސް ފާހަގަ ކުރުމުގެ ގޮތުން ދިދަ ނެގުމުގެ ރަސްމިއްޔާތު ފ. އަތޮޅު ތަޢުލީމީ މަރުކަޒުގައި ބާއްވައިފިއެވެ. މިރަސްމިއްޔާތުގައި ފ. އަތޮޅު ތަޢުލީމީ މަރުކަޒުގެ ދިދަ ނަންގަވައި ދެއްވީ 2024 ޖުލައި 26 ވަނަ ދުވަހުގެ ހެނދުނު 6.00 ގައި މިރަސްމިއްޔާތުގެ ޝަރަފުވެރި މެހުމާނު ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒެވެ.

ކޮންމެ އަހަރެއްގެ މިނިވަންދުވަހުގައި އެރަށެއްގައި ހުންނަ އެންމެ އިސް މުވައްސަސާގެ ދިދަނަގާގޮތަށް އޮތްނަމަވެސް އެހެން އަހަރުތަކާ ޚިލާފަށް މިއަހަރުގެ ދިދަ ނެގުމުގެ ރަސްމިއްޔާތު ކުރިއަށް ގެންދިއުމަށް ނިންމާފައިވާތީ، ސަރުކާރުން ހުއްދަ ދެއްވައިގެން މިއަހަރުގެ ދިދަ ނެގުމުގެ ރަސްމިއްޔާތު ބާއްވާފައިވަނީ ފ. އަތޮޅު ތަޢުލީމީ މަރުކަޒުގައެވެ.

ކީރިތި ޤުރުއާނުގެ ބަރާކާތުން މި ރަސްމިއްޔާތު ފައްޓަވައި ދެއްވީ ފ. އަތޮޅު ތަޢުލީމީ މަރުކަޒުގެ 10 ބީގެ ދަރިވަރު ޒަހާ އިސްމާޢީލް ނަޞީރެވެ. އާޔަތްތަކުގެ ތަރުޖަމާ ކިޔައިދިނީ ފ. އަތޮޅު ތަޢުލީމީ މަރުކަޒުގެ 10 ބީގެ ދަރިވަރު ޝަޔާން އަޙްމަދު ރަޝީދެވެ.

މިރަސްމިއްޔާތުގައި ދުވަހާ ގުޅޭގޮތުން ފ. އަތޮޅު ތަޢުލީމީ މަރުކަޒުގެ ދަރިވަރެއްގެ ވާހަކަ ދެއްކުން ކުރިއަށް ގެންދިޔައެވެ. މިގޮތުން ވާހަކަ ދައްކާފައިވަނީ ފ. އަތޮޅު ތަޢުލީމީ މަރުކަޒުގެ 11 ބީ ގެ ދަރިވަރު ފަދުވާ މޫސާ ނަޢީމެވެ.

ދިދަ ނެގުމުގެ މިރަސްމިއްޔާތުގައި ދިދަ ނަންގަވައި ދެއްވުމަށްފަހު ޝަރަފްވެރި މެހުމާނު ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒު ދެއްކެވި ވާހަކަފުޅުގައި، ދިވެހި ރާއްޖެއަށް މިނިވަންކަން ލިބުނުގޮތާއި، ރާއްޖޭގެ މިނިވަންކަން ގެއްލިގެންދިޔަ ފަހަރުތަކުގައި މިނިވަންކަން ގެއްލިގެންދިޔަ ގޮތާއި މިނިވަންކަން ގެއްލުނު ކޮންމެ ފަހަރަކުވެސް ދިވެހި ރައްޔިތުން ބަރުދާސްތު ކުރަމުން ގެންގޮސްފައިވާ ކަންތައްތައް ތާރީޚުން މިއަދު ފެންނަންހުރި ކަމަށާއި، ދިވެހިންގެ މިނިވަންކަން ގެއްލިގެންދިޔަ ނުދިނުމަށް މަސައްކަތްކުރުމަކީ ކޮންމެ ދިވެހި ރައްޔިތަކުވެސް ކުރަންޖެހޭ ކަމެއްކަމަށް ވިދާޅުވިއެވެ.

މިރަސްމިއްޔާތުގައި ފުލުހުންގެ ފަރާތުން ވާހަކަ ދައްކާފައިވަނީ ފ. އަތޮޅު ކޮމާންޑަރ އިންސްޕެކްޓަރ އޮފް ޕޮލިސް އަޙްމަދު ޔަޢުޤޫބެވެ. ރަށު ކައުންސިލްގެ ފަރާތުން ވާހަކަ ދައްކަވާފައިވަނީ ނިލަންދޫ ކައުންސިލްގެ ނައިބްރައީސް އިބްރާހީމް މުޙައްމަދެވެ. މިބޭފުޅުންވެސް ދެއްކެވި ވާހަކަފުޅުގައި މިނިވަންކަމުގެ މައްޗަށް އަލިއަޅުވައި ވާހަކަފުޅު ދައްކަވާފައި ވެއެވެ.

ޤައުމީ ސަލާމުން ނިންމި މިރަސްމިއްޔަތުގައި ނިލަންދޫގައިހުރި ސަރުކާރުގެ މުވައްސަސާތަކުގެ ވެރިންނާއި، މުވައްޒަފުންގެ އިތުރުން ފ. އަތޮޅު ތަޢުލީމީ މަރުކަޒުގެ މަތީ ގްރޭޑްތަކުގެ ދަރިވަރުންވެސް ބައިވެރިވެފައި ވެއެވެ.

ދިދަ ނެގުމުގެ މި ރަސްމިއްޔާތަކީ މިހާތަނަށް ދިދަ ނެގުމުގެ ރަސްމިއްޔާތެއްގައި އެންމެގިނަ މީހުން ބައިވެރިވި ރަސްމިއްޔާތެވެ.