2021 އަދި 2022 ގެ ޕާފޯމަންސް އިންޑެކްސްގެ ކާމިޔާބީ ފާހަގަ ކުރުމުގެ ޙަފްލާ ބާއްވައިފި

2021 ވަނައަހަރާއި، 2022 ވަނައަހަރުގެ ޕާފޯމަންސް އިންޑެކްސްއިން ނިލަންދެއަތޮޅު އުތުރުބުރީ އަތޮޅު ކައުންސިލަށް ލިބުނު ކާމިޔާބީ ފާހަގަކުރުމުގެ ޙަފްލާ 2024 އޮގަސްޓު 01 ވަނަ ދުވަހުގެރޭ 20.30 ގައި ފ. އަތޮޅު ތަޢުލީމީ މަރުކަޒުގައި ބާއްވައިފިއެވެ. މިޙަފްލާ ޝަރަފްވެރި ކޮށްދެއްވީ ލޯކަލް ގަވަރމަންޓް އޮތޯރިޓީގެ ޗީފް އެގްޒެކެޓިވް އޮފިސަރ މަރްޔަމް ޒުލްފާއެވެ.

ކީރިތި ޤުރުއާނުގެ ބަރަކާތުން ނިލަންދެއަތޮޅު އުތުރުބުރީ އަތޮޅު ކައުންސިލް އިދާރާގެ ލީގަލް އޮފިސަރ ޙައްވާ އަނޫޝާ ފައްޓަވައި ދެއްވި މި ރަސްމިއްޔާތު ތަޢާރަފު ކުރުމާއި މަރުޙަބާ ދަންނަވާފައިވަނީ ފ. އަތޮޅު ކައުންސިލް މެންބަރު ޢަބްދުލް ޙަމީދު އާދަމެވެ.

މި ރަސްމިއްޔާތުގައި ނިލަންދެއަތޮޅު އުތުރުބުރީ އަތޮޅު ކައުންސިލް އިދާރާއިން 2021 ވަނައަހަރާއި، 2022 ވަނަ އަހަރު ކޮށްފައިވާ މަސައްކަތްތަކާގުޅޭ ވީޑިއޯ ޕްރެޒެންޓޭޝަނެއް ދައްކާފައި ވެއެވެ. މީގެ އިތުރުން މިއިދާރާއަށް ޚިދުމަތްކުރައްވައި ރިޓަޔަރ ކުރައްވާފައިވާ ދެ މުވައްޒަފުން ކަމުގައިވާ ފ. ނިލަންދޫ ރާސްތާ ޙަސަން ޒަރީރާއި، ފ. ނިލަންދޫ ޢަޞުރުމާގޭ ފާޠިމަތު ނަޢީމާގެ މަސައްކަތްތަކާ ގުޅޭގޮތުން ތައްޔާރުކޮށްފައިވާ ވީޑިއޯ ޕްރެޒެންޓޭޝަންވެސް ދައްކާފައި ވެއެވެ.

ޚިދުމަތުން ރިޓަޔަރ ކުރައްވާފައިވާ ދެ މުވައްޒަފުން ކަމުގައިވާ ފ. ނިލަންދޫ ރާސްތާ ޙަސަން ޒަރީރާއި، ފ. ނިލަންދޫ ޢަޞުރުމާގޭ ފާޠިމަތު ނަޢީމާގެ ޚިދުމަތުގެ އަގު ވަޒަން ކުރުމުގެގޮތުން ނިލަންދެއަތޮޅު އުތުރުބުރީ އަތޮޅު ކައުންސިލުން އެ މުވައްޒަފުންނަށް ދޭ ހަނދާނީ ފިލައި މިރަސްމިއްޔާތުގައި ދީފައި ވެއެވެ. ހަނދާނީ ފިލައި އެ މުވައްޒަފުންނާއި ޙަވާލުކޮށްދެއްވީ ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒެވެ.

ޙަސަން ޒަރީރު ޢުމުރުން 65 އަހަރުވެގެން ރިޓަޔަރ ކުރެއްވިއިރު މިއިދާރާއަށް 18 އަހަރާއި 09 މަހާއި 13 ދުވަހު ޚިދުމަތް ކުރައްވާފައި ވެއެވެ. ފާޠިމަތު ނަޢީމާ ޢުމުރުން 55 އަހަރުވެގެން އަމިއްލައަށް އެދިގެން ރިޓަޔަރ ކުރެއްވިއިރު މިއިދާރާއަށް 09 އަހަރާއި 05 މަހާއި 29 ދުވަހު ޚިދުމަތް ކުރައްވާފައި ވެއެވެ.

ނިލަންދެއަތޮޅު އުތުރުބުރީ އަތޮޅު ކައުންސިލްގެ ކުރީގެ ރައީސް ޢަލީ މުޙައްމަދަކީ ނިލަންދެ އަތޮޅު އުތުރުބުރީ އަތޮޅު ކައުންސިލްގެ ރައީސްކަމުގެ މަޤާމުގައި ހުންނެވި މުއްދަތުގައި އަތޮޅު ކައުންސިލަށާއި، އަތޮޅުގެ ތަރައްޤީއަށް ގިނަގުނަ ޚިދުމަތްތަކެއް ކޮށްދެއްވާފައިވާ ބޭފުޅަކަށްވާތީ، ޚިދުމަތުގެއަގު ވަޒަން ކުރުމުގެ ގޮތުން ނިލަންދެއަތޮޅު އުތުރުބުރީ އަތޮޅު ކައުންސިލުން ޢަލީ މުޙައްމަދަށް ދޭ ހަނދާނީ ފިލައި މި ރަސްމިއްޔާތުގައި ދީފައި ވެއެވެ. ހަނދާނީ ފިލައި ޢަލީ މުޙައްމަދާއި ޙަވާލުކޮށްދެއްވީ މިރަސްމިއްޔާތުގެ ޝަރަފްވެރި މެހުމާނު ލޯކަލް ގަވަރމަންޓް އޮތޯރިޓީގެ ޗީފް އެގްޒެކެޓިވް އޮފިސަރ މަރްޔަމް ޒުލްފާއެވެ.

މި ރަސްމިއްޔާތުގައި، ނިލަންދެއަތޮޅު އުތުރުބުރީ އަތޮޅު ކައުންސިލުން ހޯދާފައިވާ ކާމިޔާބީއާއި ގުޅޭގޮތުންނާއި، މި ކާމިޔާބީ ދެމެހެއްޓުމާ ގުޅޭގޮތުން ޝަރަފްވެރި މެހުމާނު ލޯކަލް ގަވަރމަންޓް އޮތޯރިޓީގެ ޗީފް އެގްޒެކެޓިވް އޮފިސަރ މަރްޔަމް ޒުލްފާއާއި، ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ހައްވާ ޢަބްދުލް ޢަޒީޒާއި، ނިލަންދެއަތޮޅު އުތުރުބުރީ އަތޮޅު ކައުންސިލްގެ ކުރީގެ ރައީސް ޢަލީ މުޙައްމަދު ވާހަކަފުޅު ދައްކަވާފައި ވެއެވެ.

2021 ވަނަ އަހަރުގެ ޕާފޯމަންސް އިންޑެކްސް އިން އަތޮޅުކައުންސިލް ތަކުގެ ބައިން 02 ވަނަ ނިލަންދެއަތޮޅު އުތުރުބުރީ އަތޮޅު ކައުންސިލުން ހޯދައި އަދި ޕާފޯމަންސްގެ ވަކިވަކި އިންޑެކްސް ތަކުގެ ތެރެއިން ޕާޓިސިޕޭޝަން އިންޑެކްސް އިން 01 ވަނަ ނިލަންދެއަތޮޅު އުތުރުބުރީ އަތޮޅުކައުންސިލުން ހޯދާފައި ވެއެވެ.

2022 ވަނަ އަހަރުގެ ޕާފޯމަންސް އިންޑެކްސް އިން އަތޮޅުކައުންސިލް ތަކުގެ ބައިން ފަޚްރުވެރި 01 ވަނަ ނިލަންދެއަތޮޅު އުތުރުބުރީ އަތޮޅު ކައުންސިލުން ހޯދައި އަދި ވަކިވަކި އިންޑެކްސް ތަކުގެ ތެރެއިން އިފެކްޓިވްނަސް އިންޑެކްސް އާއި، ސެކިއުރިޓީ އިންޑެކްސް އިންވެސް 01 ވަނަ ނިލަންދެއަތޮޅު އުތުރުބުރީ އަތޮޅުކައުންސިލުން ހޯދާފައި ވެއެވެ.

ޕާފޯމަންސް އިންޑެކްސް އިން ވަނަވަނައަށް އަންނަ ފަރާތްތަކަށް ލޯކަލް ގަވަރމަންޓް އޮތޯރިޓީން ދެމުން ގެންދާ "ކަންގަތި އެވޯޑް" ގެ ތެރެއިން 2021 ވަނައަހަރު "ގަދަހަމާންތި ދަރަޖަ" އެވޯޑާއި ޕާޓިސިޕޭޝަން އިންޑެކްސްއިން "މާރާދަ" ހަނދާނީ ފިލައި ނިލަންދެއަތޮޅު އުތުރުބުރީ އަތޮޅުކައުންސިލަށް ލިބިފައިވެއެވެ. އަދި 2022 ވަނައަހަރު "ގަދަހަމާންތި ދަރަޖަ" އެވޯޑާއި ޕާފޯމަންސްގެ ވަކިވަކި އިންޑެކްސް ތަކުގެ ތެރެއިން އިފެކްޓިވްނަސް އިންޑެކްސްއާއި ސެކިއުރިޓީ އިންޑެކްސް އިން "މާރާދަ" ހަނދާނީ ފިލައި ނިލަންދެއަތޮޅު އުތުރުބުރީ އަތޮޅުކައުންސިލަށް ލިބިފައި ވެއެވެ.

ޤައުމީ ސަލާމުން ނިންމި މިރަސްމިއްޔަތުގައި އަތޮޅު ކައުންސިލްގެ މެންބަރުނާއި، ވެރިންނާއި މުވައްޒަފުންގެ އިތުރުން ނިލަންދޫގައިހުރި ސަރުކާރުގެ މުވައްސަސާތަކުގެ އިސްވެރިން ބައިވެރިވެފައި ވެއެވެ.

މި ޙަފްލާ ހުށަހަޅާދީފައިވަނީ ނިލަންދެއަތޮޅު އުތުރުބުރީ އަތޮޅު ކައުންސިލް އިދާރާގެ ސީނިއަރ ކައުންސިލް އޮފިސަރ ފާޠިމަތު ނުޒުލާ ޖަލީލުއާއި، އެކައުންޓްސް އޮފިސަރ ޢަލީ އަޙްމަދެވެ.