"ފާފު ވޮލީ މުބާރާތް 2024" ގެ ގުރުއަތުނެގުން ކުރިއަށް ގެންގޮސްފި

ނިލަންދެއަތޮޅު އުތުރުބުރީ އަތޮޅު ކައުންސިލުން އިންތިޒާމް ކޮށްގެން 10 އޮގަސްޓު 2024 ގައި ފެށުމަށް ހަމަޖެހިފައިވާ "ފާފު ވޮލީ މުބާރާތް 2024" ގެ ގުރުއަތުނެގުން ނިލަންދެއަތޮޅު އުތުރުބުރީ އަތޮޅު ކައުންސިލްގެ އިދާރާގައި ބާއްވައިފިއެވެ.

2024 އޮގަސްޓު 05 ވަނަ ދުވަހުގެ 10.00 ގައި ނިލަންދެއަތޮޅު އުތުރުބުރީ އަތޮޅު ކައުންސިލްގެ އިދާރާގެ ޖަލްސާކުރާ މާލަމްގައި ބޭއްވި ގުރުއަތުނެގުމުގައި ފީއަލި ފިޔަވައި އެހެން ރަށްރަށުން ބައިވެރިވެފައި ވެއެވެ.

2024 ވަނަ އަހަރުގެ ވޮލީ މުބާރާތް އޮންނާނީ ނިލަންދެއަތޮޅު އުތުރުބުރީ މަގޫދޫގައެވެ. ވޮލީ މުބާރާތުގެ ހުރިހާ މެޗުތަކެއް ކުޅޭނީ ފ. މަގޫދޫ ވޮލީ ކޯޓްގައެވެ. ފ. މަގޫދޫ ވޮލީކޯޓަކީ ވޮލީ ކުޅުމަށް ޚާއްޞަކޮށްގެން ހަދާފައިވާ، ހުރިހާ ވަސީލަތްތަކެއް ޤާއިމް ކޮށްފައިވާ ވޮލީ ކޯޓެކެވެ. މިއަރުގެ މުބާރާތް މަގޫދޫގައި ބާއްވާގޮތަށް ހަމަޖައްސާފައިވަނީ މުބާރާތް ހޯސްޓް ކުރުމަށް ރަށު ކައުންސިލް ތަކަށް ހުޅުވާލުމުން އެންމެ ރަނގަޅު ޕްރޮޕޯޒަލެއް މަގޫދޫ ކައުންސިލުން ހުށަހަޅައިގެން ހޯސްޓިންގ ކާމިޔާބު ކުރުމުންނެވެ.

ރަށު ކައުންސިލްތަކުގެ މެދުގައި ކުރިއަށްގެންދާ މި މުބާރާތުގައި ކޮންމެ ކައުންސިލަކުންވެސް އަންހެންޓީމަކާއި ފިރިހެން ޓީމެއް ބައިވެރިކޮށްފައި ވެއެވެ. ޖުމްލަ 10 ޓީމު ވާދަކުރާ މި މުބާރާތުގައި ފުރަތަމަ ބައްދަލުކުރާނީ ފިރިހެން ޑިވިޜަންގެ ދެޓީމު ކަމުގައިވާ ފީއަލީ ކައުންސިލްގެ ފިރިހެން ޓީމާއި ބިލެއްދޫ ކައުންސިލްގެ ފިރިހެން ޓީމެވެ. މި މުބާރާތް ފެށުމުގެ ރަސްމިއްޔާތު އޮންނާނީ 2024 އޮގަސްޓު 10 ވަނަ ދުވަހުގެރޭގައި ކުޅުމަށް ހަމަޖެހިފައިވާ އަންހެން ޑިވިޜަންގެ މެޗު ފެށުމުގެ ކުރިންނެވެ. އަންހެން ޑިވިޜަނުގެ ފުރަތަމަ މެޗުގައި ބައްދަލުކުރާނީ ފީއަލީ ކައުންސިލްގެ އަންހެން ޓީމާއި، ބިލެއްދޫ ކައުންސިލްގެ އަންހެން ޓީމެވެ.

މި މުބާރާތުގެ މެޗުތައް ކުރިއަށް ގެންދާނީ ދެ ދަންފަޅިއަކަށް ބަހާލައިގެންނެވެ. ފިރިހެން ޑިވިޜަންގެ މެޗުތައް ކުރިއަށް ގެންދާނީ ހަވީރުއެވެ. އަންހެން ޑިވިޜަންގެ މެޗުތައް ކުރިއަށް ގެންދާނީ ރޭގަނޑުއެވެ. ހަވީރުކުޅޭ ފިރިހެން ޑިވިޜަންގެ މެޗުތައް ފެށޭނީ ހަވީރު 4.30 ގައެވެ. ރޭގަނޑުކުޅޭ އަންހެން ޑިވިޜަންގެ މެޗުތައް ފެށޭނީ ރޭގަނޑު 20.30 ގައެވެ.

2024 އޮގަސްޓު 10 ވަނަ ދުވަހުން ފެށިގެން 2024 އޮގަސްޓު 19 ވަނަ ދުވަހުގެ ނިޔަލަށް ކޮންމެ ދުވަހަކުވެސް އަންހެން ޑިވިޜަންގެ މެޗަކާއި ފިރިހެން ޑިވިޜަންގެ މެޗެއްގެ ކުޅުން ކުރިއަށް ގެންދާނެއެވެ. މި މުބާރާތުގައި ފައިނަލުގައި ވާދަކުރާނީ ކޮންމެ ޑިވިޜަނެއްގައި ހިމެނޭ ޓީމުތައް، ކޮންމެ ޓީމެއް ކޮންމެޓީމަކާ ބައްދަލުކޮށް އެންމެގިނަ ޕޮއިންޓު ހޯދާ ދެ ޓީމެވެ. މި މުބާރާތުގެ އަންހެން ޑިވިޜަނާއި، ފިރިހެން ޑިވިޜަންގެ ފައިނަލްމެޗު އޮންނާނީ 2021 އޮގަސްޓު 21 ވަނަ ދުވަހުއެވެ.

ނިލަންދެއަތޮޅު އުތުރުބުރީ އަތޮޅު ކައުންސިލުން އިންތިޒާމް ކޮށްގެން 2023 ވަނަ އަހަރު ރަށުކައުންސިލް ތަކުގެ މެދުގައި ކުރިއަށް ގެންދިޔަ ވޮލީ މުބާރާތް ބާއްވާފައިވަނީ މިއަތޮޅު ނިލަންދޫގައެވެ. އެ މުބާރާތުގައި ބިލެއްދޫ ކައުންސިލް ފިޔަވައި އެހެން ކައުންސިލްތަކުން އަންހެން ޓީމަކާއި ފިރިހެން ޓީމެއް ބައިވެރިކޮށްފައި ވެއެވެ. ޖުމްލަ 08 ޓީމު ވާދަކުރި މި މުބާރާތުގެ ފިރިހެން ޑިވިޜަންގެ ޗެންޕިއަން ޓީމަކީ ނިލަންދޫ ކައުންސިލްގެ ޓީމެވެ. އަންހެން ޓިވިޜަންގެ ޗެންޕިއަން ޓީމަކީ މަގޫދޫ ކައުންސިލްގެ ޓީމެވެ.

މި މުބާރާތަކީ އަތޮޅު ކައުންސިލް އުފެދުނުފަހުން އަތޮޅު ކައުންސިލުން އިންތިޒާމްކޮށްގެން ބާއްވާ ދެވަނަ ވޮލީ މުބާރާތެވެ.