"ފާފު ވޮލީ މުބާރާތް 2024" ގެ މީޑިއާ ޕާޓްނަރަކަށް ދަނިއުސް ހަމަޖައްސައިފި

ނިލަންދެއަތޮޅު އުތުރުބުރީ އަތޮޅު ކައުންސިލުން އިންތިޒާމް ކޮށްގެން 10 އޮގަސްޓު 2024 ގައި ފެށުމަށް ހަމަޖެހިފައިވާ "ފާފު ވޮލީ މުބާރާތް 2024" ގެ މީޑިއާ ޕާޓްނަރަކަށް ދަނިއުސް ހަމަޖައްސައިފިއެވެ.

ވޮލީ މުބާރާތުގެ މީޑިއާ ޕާޓްނަރެއް ހޯދުމަށް ނިލަންދެއަތޮޅު އުތުރުބުރީ އަތޮޅު ކައުންސިލުން ދެފަހަރު އިޢުލާނު ކުރުމުންވެސް އެއްވެސް ފަރާތަކުން ކުރިމަތިލާފައިނުވާތީ، ވޮލީ މުބާރާތުގެ މީޑިއާ ޕާޓްނަރެއްގެ ގޮތުގައި ދަނިއުސްއިން މަސައްކަތް ކޮށްދިނުމަށް ނިލަންދެއަތޮޅު އުތުރުބުރީ އަތޮޅު ކައުންސިލާއި ދަނިއުސްއާއެކު 2024 ޖުލައި 24 ވަނަ ދުވަހު ދަރަނބޫދޫ ކައުންސިލް އިދާރާގައި ބައްދަލުވުމެއް ބާއްވާފައިވެއެވެ. މިބައްދަލުވުމުގައި ދެފަރާތުން ބޭނުންވާ ކަންތައްތަކުގެ މައްޗަށް މަޝްވަރާކުރުމަށްފަހު، ދަނިއުސްއިން މީޑިއާ ޕާޓްނަރެއްގެ ގޮތުގައި މަސައްކަތްކޮށްދިނުމަށްވަނީ އެއްބަސްވެފައެވެ.

މިއަހަރުގެ ވޮލީ މުބާރާތުގެ މީޑިއާ ޕާޓްނަރެއްގެ ގޮތުގައި މަސައްކަތްކުރުމަށް ދެފަރާތުން އެއްބަސްވާ ކަންތައްތަކުގެ މައްޗަށް ބިނާކޮށް ތައްޔާރު ކޮށްފައިވާ އެއްބަސްވުމުގައި ސޮއިކުރުން އޮތީ 2024 އޮގަސްޓު 05 ވަނަ ދުވަހު ނިލަންދެއަތޮޅު އުތުރުބުރީ އަތޮޅު ކައުންސިލްގެ އިދާރާގައެވެ. މި އެއްބަސްވުމުގައި ނިލަންދެއަތޮޅު އުތުރުބުރީ އަތޮޅު ކައުންސިލްގެ ފަރާތުން ސޮއިކުރީ ކައުންސިލްގެ ރައީސް ޙައްވާ ޢަބްދުލް ޢަޒީޒެވެ. ދަނިއުސްގެ ފަރާތުން ސޮއިކުރީ އަޙްމަދު ޒުމީނެވެ. މި އެއްބަސްވުމުގައިވާ ގޮތުގެމަތިން މުބާރާތުގެ ހުރިހާ މެޗްތަކެއް ދައުނިއުސް އިން ވަގުތުން ލައިވް ކުރާނެއެވެ. އަދި މުބާރާތުގެ ޕޯސްޓްތައް ހެދުމާއި، ނަގަންޖެހޭ ފޮޓޯތައް ގެނުމާއި، މުބާރާތުގެ ޚަބަރުތައް ފެތުރުމުގެ މަސައްކަތްވެސް ދަނިއުސްއިން ކުރަމުން ގެންދާނެއެވެ.

ރަށު ކައުންސިލްތަކުގެ މެދުގައި ކުރިއަށްގެންދާ މި މުބާރާތް މިއަހަރު ކުރިއަށް ގެންދާނީ ފ. މަގޫދޫގައެވެ. ހުރިހާ މެޗުތަކެއް ކުޅޭނީ ފ. މަގޫދޫ ވޮލީކޯޓުގައެވެ. މިއަހަރުގެ މުބާރާތުގައި ކޮންމެ ކައުންސިލަކުންވެސް އަންހެން ޓީމަކާއި ފިރިހެން ޓީމެއް ބައިވެރިކޮށްފައި ވެއެވެ. ޖުމްލަ 10 ޓީމު ވާދަކުރާ މި މުބާރާތުގައި ފުރަތަމަ ބައްދަލުކުރާނީ ފިރިހެން ޑިވިޜަންގެ ދެޓީމު ކަމުގައިވާ ފީއަލީ ކައުންސިލްގެ ފިރިހެން ޓީމާއި ބިލެއްދޫ ކައުންސިލްގެ ފިރިހެން ޓީމެވެ.

މި މުބާރާތުގެ މެޗުތައް ކުރިއަށް ގެންދާނީ ދެ ދަންފަޅިއަކަށް ބަހާލައިގެންނެވެ. ފިރިހެން ޑިވިޜަންގެ މެޗުތައް ކުރިއަށް ގެންދާނީ ހަވީރުއެވެ. އަންހެން ޑިވިޜަންގެ މެޗުތައް ކުރިއަށް ގެންދާނީ ރޭގަނޑުއެވެ. ހަވީރުކުޅޭ ފިރިހެން ޑިވިޜަންގެ މެޗުތައް ފެށޭނީ ހަވީރު 4.30 ގައެވެ. ރޭގަނޑުކުޅޭ އަންހެން ޑިވިޜަންގެ މެޗުތައް ފެށޭނީ ރޭގަނޑު 20.30 ގައެވެ.

2024 އޮގަސްޓު 10 ވަނަ ދުވަހުން ފެށިގެން 2024 އޮގަސްޓު 19 ވަނަ ދުވަހުގެ ނިޔަލަށް ކޮންމެ ދުވަހަކުވެސް އަންހެން ޑިވިޜަންގެ މެޗަކާއި ފިރިހެން ޑިވިޜަންގެ މެޗެއްގެ ކުޅުން ކުރިއަށް ގެންދާނެއެވެ. މި މުބާރާތުގައި ފައިނަލުގައި ވާދަކުރާނީ ކޮންމެ ޑިވިޜަނެއްގައި ހިމެނޭ ޓީމުތައް، ކޮންމެ ޓީމެއް ކޮންމެޓީމަކާ ބައްދަލުކޮށް އެންމެގިނަ ޕޮއިންޓު ހޯދާ ދެ ޓީމެވެ. މި މުބާރާތުގެ އަންހެން ޑިވިޜަނާއި، ފިރިހެން ޑިވިޜަންގެ ފައިނަލްމެޗު އޮންނާނީ 2021 އޮގަސްޓު 21 ވަނަ ދުވަހުއެވެ.

ނިލަންދެއަތޮޅު އުތުރުބުރީ އަތޮޅު ކައުންސިލުން އިންތިޒާމް ކޮށްގެން މިއަތޮޅުގެ ސްކޫލް މަދަރުސާ ތަކުގެ ދަރިވަރުންގެ މެދުގައި 2023 އޮކްޓޫބަރ 08 އިން 13 އަށް މިއަތޮޅު ބިލެއްދޫގައި ކުރިއަށްގެންދިޔަ ފ. އަތޮޅު އިންޓަރސްކޫލް ކުޅިވަރު މުބާރާތުގެ މީޑިއާ ޕާޓްނަރުކަން ކޮށްފައިވަނީ ދަނިއުސްއިންނެވެ. އަދި ރަށުކައުންސިލް ތަކުގެ މެދުގައި 2023 އޮގަސްޓް 10 އިން 16 އަށް މިއަތޮޅު ނިލަންދޫގައި ކުރިއަށް ގެންދިޔަ ވޮލީ މުބާރާތުގެ މީޑިއާ ޕާޓްނަރުކަންވެސް ކޮށްފައިވަނީ ދަނިއުސް އިންނެވެ. ދަނިއުސް ޓީމުން މި މަސައްކަތް ވަރަށް ރަގަނޅަށް ކުރިއަށް ގެންގޮސްފައިވާކަން ފާހަގަ ކުރެވެއެވެ.