އަލަށް އިންތިޚާބުކުރި ފ. ބިލެއްދޫ ކައުންސިލްގެ ރައީސް، އަތޮޅުކައުންސިލް މެންބަރު ކަމުގެ ހުވައި ކޮށްފި

ނިލަންދެއަތޮޅު އުތުރުބުރީ ބިލެއްދޫ ކައުންސިލްގެ ރައީސްކަމަށް އަލަށް އިންތިޚާބު ކުރި ފ. ބިލެއްދޫ ސާމަރާމަންޒިލް އަރީޙް އިސްމާޢީލް، ނިލަންދެއަތޮޅު އުތުރުބުރީ އަތޮޅު ކައުންސިލް މެންބަރުކަމުގެ ހުވައި ކޮށްފިއެވެ.

އަރީޙް އިސްމާޢީލް އަތޮޅު ކައުންސިލް މެންބަރު ކަމުގެ ހުވައި ކޮށްފައިވަނީ ބިލެއްދޫ ކައުންސިލްގެ ރައީސްކަމާއި، އަތޮޅު ކައުންސިލް މެންބަރުކަމުގެ ހުވައި ކުރުމަށް 2024 އޮގަސްޓު 07 ވަނަ ދުވަހުގެރޭ ފ. ބިލެއްދޫ ކައުންސިލްގެ އިދާރާގެ ގޯތިތެރޭގައި ބޭއްވި ރަސްމިއްޔާތުގައެވެ. މިރަސްމިއްޔާތުގައި އަރީޙް އިސްމާޢީލް ފުރަތަމަ ކުރެއްވީ ބިލެއްދޫ ކައުންސިލްގެ ރައީސް ކަމުގެ ހުވައެވެ. އޭގެފަހުން އަތޮޅުކައުންސިލް މެންބަރުކަމުގެ ހުވައެވެ. ހުވައިލައިދެއްވީ ފ. ބިލެއްދޫ މެޖިސްޓްރޭޓް ކޯޓްގެ އިސް މެޖިސްޓްރޭޓެވެ.

މިރަސްމިއްޔާތުގައި ބިލެއްދޫ ދާއިރާގެ ރައްޔިތުންގެ މަޖްލީހުގެ ޢިއްޒަތްތެރި މެންބަރު އަޙްމަދު އަސްލަމް ބައިވެރިވެ ވަޑައިގެންނެވިއެވެ. އަރީޙު އިސްމާޢީލްގެ ކުރިން ބިލެއްދޫ ކައުންސިލްގެ ރައީސްކަމުގެ މަޤާމުގައި ހުންނެވީ އަޙްމަދު އަސްލަމެވެ.

ބިލެއްދޫ ކައުންސިލްގެ ރައީސްކަމާއި، އަތޮޅު ކައުންސިލް މެންބަރުކަމުގެ ހުވައި ކުރުމުގެ ރަސްމިއްޔާތުގައި ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒާއި، ނައިބްރައީސް ޢަބްދުﷲ ވަޙީދާއި، އަތޮޅު ކައުންސިލްގެ މެންބަރު ޢަބްދުލް ޙަމީދު އާދަމްގެ އިތުރުން އަތޮޅު ކައުންސިލް އިދާރާގެ ބައެއް ވެރިން ބައިވެރިވެފައި ވެއެވެ.

ނިލަންދެއަތޮޅު އުތުރުބުރީ ބިލެއްދޫ ކައުންސިލްގެ ރައީސްކަމަށް އަރީޙް އިސްމާޢީލް އިންތިޚާބު ކޮށްފައިވަނީ 2024 ޖުލައި 20 ވަނަ ދުވަހު ބޭއްވި ބައި-އިލެކްޝަން ކާމިޔާބު ކޮށްގެންނެވެ. ބިލެއްދޫ ކައުންސިލްގެ ރައީސްކަމަށް އަރީޙް އިސްމާޢީލްގެ އިތުރުން ކުރިމަތިލާފައިވަނީ ފ. ބިލެއްދޫ ރަތްވިލާގޭ ޝާއިލް މާހިރެވެ. މި އިންތިޚާބުގައި އަރީޙް އިސްމާޢީލަށް 414 ވޯޓު ލިބިފައިވާއިރު ޝާއިލް މާހިރަށް ލިބިފައިވަނީ 386 ވޯޓެވެ.