"ފާފު ވޮލީ މުބާރާތް 2024" ފަށައިފި – ފުރަތަމަ މެޗުގައި ފީއަލި، ބިލެއްދޫ ބައްދަލު ކުރުން
"ފާފު ވޮލީމުބާރާތް 2024" މިއަދު ހަވީރު 4.30 ގައި ނިލަންދެއަތޮޅު އުތުރުބުރީ މަގޫދޫގައި ފަށައިފިއެވެ.
ނިލަންދެއަތޮޅު އުތުރުބުރީ އަތޮޅު ކައުންސިލުން އިންތިޒާމްކޮށްގެން މިއަތޮޅުގެ ރަށުކައުންސިލް ތަކުގެ މެދުގައި ކުރިއަށް ގެންދާ މި މުބަރާތް ފެށުމުގެ މެޗުގައި ބައްދަލުކުރީ ފީއަލީ ކައުންސިލާއި، ބިލެއްދޫ ކައުންސިލްގެ ފިރިހެން ޓީމެވެ.
މި މެޗު ޝަރަފްވެރި ކޮށްދެއްވީ ނިލަންދެއަތޮޅު އުތުރުބުރީ އަތޮޅުކައުންސިލްގެ ރައީސް ޙައްވާ ޢަބްދުލް ޢަޒީޒެވެ.
މިއަހަރުގެ މުބާރާތުގައި ހުރިހާ ކައުންސިލްތަކުންވެސް ބައިވެރިވެ ކޮންމެ ކައުންސިލަކުންވެސް ފިރިހެން ޓީމަކާއި އަންހެން ޓީމެއް ބައިވެރިކޮށްފައި ވެއެވެ. ޖުމްލަ 10 ޓީމު ވާދަކުރާ މި މުބާރާތް ކުރިއަށްދާނީ 2024 އޮގަސްޓު 10 އިން 21 ގެ ނިޔަލަށެވެ.
މިއަހަރު ކުރިއަށްގެންދާ މި މުބާރާތް އިންތިޒާމް ކޮށްފައިވަނީ މިއަތޮޅުގެ ރަށްވެހިންނާއި، މިއަތޮޅުގެ ރަށެއްގެ މީހަކާއި އިދެގެން އުޅޭ ބޭރު އަތޮޅުތަކަށް ނިސްބަތްވާ މީހުންނާއި އެމީހުންގެ ދަރިން ފިޔަވައި މިއަތޮޅުގެ ރަށަކަށް ނިސްބަތްނުވާ ބޭރުއަތޮޅު ތަކުގެ މީހުންނާއި ރާއްޖެއިން ބޭރުގެ ކުޅުންތެރިންނަށް މި މުބާރާތުގައި ނުކުޅެވޭ ގޮތަށެވެ.
މި މުބާރާތުގެ ކޮންމެ ޑިވިޜަނެއްގެ ޗެންޕިއަންޓީމަށް ނިލަންދެއަތޮޅު އުތުރުބުރީ އަތޮޅުކައުންސިލުން -/20،000 ރުފިޔާ، ރަނަރަޕް ޓީމަށް -/10،000 ރުފިޔާގެ ފައިސާގެ އިނާމު ދިނުމަށް ވަނީ ހަމަޖެހިފައެވެ.
މި މުބާރާތުގެ މީޑިއާ ޕާޓްނަރަކީ ނިލަންދެއަތޮޅު ދަރަނބޫދޫ ދަނިއުސްއެވެ. ދަނިއުސްއިން މި މުބާރާތުގެ ހުރިހާ މެޗުތަކެއް ވަގުތުން ލައިވް ކުރަމުން ގެންދާނެއެވެ. އަދި މުބާރާތުގެ ފޮޓޯތައް ނެގުމާއި، މުބާރާތުގެ ޚަބަރުތައްވެސް ދުވަހުން ދުވަހަށް ދަނިއުސްގެ ވެބްސައިޓާއި ފޭސްބުކް ޕޭޖްގައި ޢާންމުކުރަމުން ގެންދާނެއެވެ.
މި މުބާރާތް ފެށުމުގެ ރަސްމިއްޔާތު އޮންނާނީ މިރޭ (10 އޮގަސްޓު 2024 ދުވަހުގެރޭ) 20.30 ގައި ކުޅުމަށްހަމަޖެހިފައިވާ ފީއަލީ ކައުންސިލާއި، ބިލެއްދޫ ކައުންސިލްގެ އަންހެން ޓީމުގެ މެޗު ފެށުމުގެ ކުރިންނެވެ. މިރަސްމިއްޔާތުގެ ޝަރަފްވެރި މެހުމާނަކީ ވޮލީ ބޯލް އެސޯސިއޭޝަން އޮފް މޯލްޑިވްސްގެ ސީނިއަރ ނައިބްރައީސް މުޙައްމަދު ސާޖިދެވެ.
މިއަހަރުގެ ވޮލީ މުބާރާތް ހޯސްޓްކޮށްފައިވަނީ ނިލަންދެއަތޮޅު އުތުރުބުރީ މަގޫދޫ ކައުންސިލުންނެވެ.
