"ފާފު ވޮލީ މުބާރާތް 2024" ގެ ފިރިހެން ޑިވިޜަންގެ ޗެންޕިއަންކަން މަގޫދޫ ކައުންސިލުން ހޯދައިފި
ނިލަންދެއަތޮޅު އުތުރުބުރީ އަތޮޅު ކައުންސިލުން އިންތިޒާމް ކޮށްގެން މިއަތޮޅު މަގޫދޫގައި މިހާރު ކުރިއަށްދާ ވޮލީ މުބާރާތުގެ ފިރިހެން ޑިވިޜަންގެ ޗެންޕިއަންކަން މަގޫދޫ ކައުންސިލުން ހޯދައިފިއެވެ.
މަގޫދޫ ކައުންސިލްގެ ޓީމު ޗެންޕިއަންކަން ހޯދާފައިވަނީ 21 އޮގަސްޓު 2024 ވަނަ ދުވަހުގެ ހަވީރު 4.15 ގައި ފ. މަގޫދޫ ވޮލީ ކޯޓުގައި ކުޅުނު ވޮލީމެޗުގައި ފީއަލީ ކައުންސިލްގެ ޓީމާއި ވާދަކޮށްގެން ތިންސެޓު ދެ ސެޓުން މެޗު ކާމިޔާބު ކޮށްގެންނެވެ.
ދެ ޓީމުންވެސް ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ސެޓު ފީއަލީ ކައުންސިލްގެ ޓީމުން ކާމިޔާބު ކުރީ 25-20 އިންނެވެ. ވާދަވެރި ކުޅުމަކަށްފަހު މަގޫދޫ ކައުންސިލްގެ ޓީމުން 22-25 އިން ދެވަނަ ސެޓުވަނީ ކާމިޔާބު ކޮށްފަ އެވެ. ފުރަތަމަ ދެ ސެޓާ ޚިލާފަށް ތިންވަނަ ސެޓުގައި ފީއަލީ ކައުންސިލްގެ ޓީމުންވަނީ ލީޑުގައިއޮވެ ކުޅެފައެވެ. އެ ޓީމުން ތިންވަނަ ސެޓު ކާމިޔާބުކުރީ 25-15 އިންނެވެ. ރަނގަޅު ލީޑެއްގައިއޮވެ ޖެހިގެން ކުޅުނު ހަތަރު ވަނަ ސެޓު މަގޫދޫ ކައުންސިލްގެ ޓީމުން ކާމިޔާބުކުރީ 19-25 އިންނެވެ. ނަތީޖާ ނެރުމަށް ކުޅުނު ފަސްވަނަ ސެޓު މަގޫދޫ ކައުންސިލްގެ ޓީމުން ކާމިޔާބުކުރީ 8-15 އިންނެވެ.
ފައިނަލް މެޗުގެ މޮޅު ކުޅުންތެރިއަކަށް ހޮވިފައިވަނީ މަގޫދޫ ކައުންސިލްގެ ޓީމުގެ މުޙައްމަދު ޢަރީފެވެ. މި ކުޅުންތެރިޔާއަށް ޓްރޮފީ ޙަވާލުކޮށްދެއްވީ ފ. މަގޫދޫ ކައުންސިލް އިދާރާގެ ސެކްރެޓަރީ ޖެނެރަލް އިބްރާހީމް މުޙައްމަދެވެ.
މި މުބާރާތުގެ ފިރިހެން ޑިވިޜަންގެ އެންމެމޮޅު (ޑްރީމް ޑީމު) ހަ ކުޅުންތެރިންގެ ތެރޭގައި ހިމެނިފައިވަނީ ފީއަލީ ކައުންސިލްގެ ޓީމުގެ އާޒިމް މުޙައްމަދު، އާލިމް އިބްރާހީމް، ޢަބްދުﷲ ޝަރީފް، މަގޫދޫ ކައުންސިލްގެ ޓީމުގެ މުޙައްމަދު އަރީފް، ނިލަންދޫ ކައުންސިލްގެ ޓީމުގެ އިބްރާހީމް އަތޫފް އަދި އަލީ ޞަބާޙުއެވެ. މި ކުޅުންތެރިންނަށް ތައްޓާއި ހަނދާނީލިއުން ޙަވާލުކޮށްދެއްވީ ފ. އަތޮޅު ޕޮލިސް ކޮމާންޑަރ އިންސްޕެކްޓަރ އޮފް ޕޮލިސް އަޙްމަދު ޔަޢުޤޫބެވެ.
ފިރިހެން ޑިވިޝަންގެ އެންމެ މޮޅު ކުޅުންތެރިޔަކަށް ފީއަލީ ކައުންސިލްގެ ޓީމުގެ އާޒިމް މުޙައްމަދު ހޮވުނުއިރު، އެންމެ މޮޅު ލިބަރޯ އަކަށް ހޮވުނީ އެ ޓީމުގެ އަޙުމަދު ޝަރީފެވެ. މި ޑިވިޝަންގެ 21 އަހަރުން ދަށުގެ އެންމެ އުންމީދީ ކުޅުންތެރިޔަކަށް ނިލަންދޫ ކައުންސިލްގެ ޓީމުގެ އަޙުމަދު ޒިމާމް ޝަރީފް ހޮވުނުއިރު، އެންމެ މޮޅު ކޯޗަކަށް ހޮވުނީ ޗެމްޕިއަން މަގޫދޫ ޓީމުގެ ކޯޗު ޙަސަން ޝިޔާމެވެ.
މި މުބާރާތުގެ ފެއާޕްލޭ ޓީމަކަށް ހޮވިފައިވަނީ ނިލަންދޫ ކައުންސިލްގެ ޓީމެވެ. މި ޓީމަށް ތައްޓާއި ހަނދާނީ ލިއުން ޙަވާލު ކޮށްދެއްވީ ނިލަންދެއަތޮޅު އުތުރުބުރީ އަތޮޅު ކައުންސިލްގެ ނައިބްރައީސް ޢަބްދުﷲ ވަޙީދެވެ.
ޗެންޕިއަންކަން ހޯދި މަގޫދޫ ކައުންސިލްގެ ޓީމަށް ތައްޓާއި، މެޑަލްއާއި، -/20،000 ރުފިޔާގެ ފައިސާގެ އިނާމު ޙަވާލު ކޮށްދެއްވީ ފައިނަލް މެޗުގެ ޝަރަފްވެރި މެނުމާނު ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒެވެ. ރަނަރަޕް ކަން ހޯދި ފީއަލީ ކައުންސިލްގެ ޓީމަށްވެސް ތައްޓާއި މެޑަލް އަދި -/10،000 ރުފިޔާގެ ފައިސާގެ އިނާމު ޙަވާލު ކޮށްދެއްވީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒެވެ.
2023 ވަނަ އަހަރުގެ ޗެންޕިއަން ޓީމަކީ ނިލަންދޫ ކައުންސިލްގެ ޓީމެވެ. ފާއިތުވި އަހަރު ފައިނަލްގައި ވާދަކުރީ ފީއަލީ ކައުންސިލްގެ ޓީމާއި ނިލަންދޫ ކައުންސިލްގެ ޓީމެވެ. ފާއިތުވި އަހަރުގެ މުބާރާތުގައި ރާއްޖެއިން ބޭރުގެ ކުޅުންތެރިންވެސް ކުޅެފައި ވެއެވެ.
