"ފާފު ވޮލީ މުބާރާތް 2024" ގެ އަންހެން ޑިވިޜަންގެ ޗެންޕިއަންކަން ދަރަނބޫދޫ ކައުންސިލުން ހޯދައިފި
ނިލަންދެއަތޮޅު އުތުރުބުރީ އަތޮޅު ކައުންސިލުން އިންތިޒާމް ކޮށްގެން މިއަތޮޅު މަގޫދޫގައި ކުރިއަށް ގެންދިޔަ ވޮލީ މުބާރާތުގެ އަންހެން ޑިވިޜަންގެ ޗެންޕިއަންކަން ފ. ދަރަނބޫދޫ ކައުންސިލުން ހޯދައިފިއެވެ.
ދަރަނބޫދޫ ކައުންސިލުން ޗެންޕިއަންކަން ހޯދާފައިވަނީ 21 އޮގަސްޓު 2024 ދުވަހުގެރޭ 20.30 ގައި ފ. މަގޫދޫ ވޮލީ ކޯޓުގައި ކުޅުނު ވޮލީމެޗުގައި މަގޫދޫ ކައުންސިލްގެ ޓީމާއި ވާދަކޮށްގެން ސީދާ ތިންސެޓުން މެޗު ކާމިޔާބު ކޮށްގެންނެވެ.
މެޗުގެ ފުރަތަމަ ސެޓުގައި ދެ ޓީމުންވެސް ވާދަވެރި ކުޅުމެއް ކުޅެފައި ވެއެވެ. މަގޫދޫ ކައުންސިލްގެ ޓީމުން ފުރަތަމަ ސެޓުގައި ލީޑު ނަގާފައި ވަނިކޮށް، ފަހަތުން އަރައި ދަރަނބޫދޫ ކައުންސިލްގެ ޓީމުން ސެޓު ކާމިޔާބު ކުރީ 26-24 އިންނެވެ. ދެވަނަ ސެޓު ވަރުގަދަކޮށް ފަށައި، ދަރަނބޫދޫ ކައުންސިލްގެ ޓީމުން މިސެޓު ކާމިޔާބުކުރީ ރަނގަޅު ލީޑެއްގައި އޮވެއެވެ. ދެވަނަ ސެޓު ދަރަނބޫދޫ ކައުންސިލްގެ ޓީމުން ކާމިޔާބު ކުރީ 25-14 އިންނެވެ. ޖެހިގެން ކުޅުނު ތިންވަނަ ސެޓު އެ ޓީމުން ކާމިޔާބުކުރީ 25-9 އިންނެވެ.
ފައިނަލް މެޗުގެ މޮޅު ކުޅުންތެރިއަކަށް ހޮވިފައިވަނީ ދަރަނބޫދޫ ކައުންސިލްގެ ޓީމުގެ ފާޠިމަތު ޠަހޫރާއެވެ. މި ކުޅުންތެރިޔާއަށް ޓްރޮފީ ޙަވާލުކޮށްދެއްވީ ވޮލީގެ ތަޖުރިބާ ކޯޗު ޝުޢައިބު އަޙްމަދެވެ.
މި މުބާރާތުގެ އަންހެން ޑިވިޜަންގެ އެންމެމޮޅު (ޑްރީމް ޑީމު) ހަ ކުޅުންތެރިންގެ ތެރޭގައި ހިމެނިފައިވަނީ މަގޫދޫ ކައުންސިލްގެ ޓީމުގެ ޒުނާހާ އަޙްމަދު، އާމިނަތު ވަސާމާ، ޢާއިޝަތު ޒުނީތާ، ދަރަނބޫދޫ ކައުންސިލްގެ ޓީމުގެ ފާޠިމަތު ޠަހޫރާ، ފަޒްލާ އާދަމް އަދި ފީއަލީ ކައުންސިލް ޓީމުގެ ލީމް ޢަބްދުއްލަޠީފެވެ. މި ކުޅުންތެރިންނަށް ތައްޓާއި ހަނދާނީލިއުން ޙަވާލުކޮށްދެއްވީ ނިލަންދެއަތޮޅު އުތުރުބުރީ އަތޮޅު ކައުންސިލްގެ ނައިބްރައީސް ޢަބްދުﷲ ވަޙީދެވެ.
މި ޑިވިޜަންގެ އެންމެ މޮޅު ކުޅުންތެރިޔަކަށް ދަރަނބޫދޫ ކައުންސިލްގެ ޓީމުގެ ފާޠިމަތު ޠަހޫރާ ހޮވުނުއިރު، އެންމެ މޮޅު ލިބަރޯ އަކަށް ހޮވުނީ ނިލަންދޫ ކައުންސިލްގެ ޓީމުގެ އަރީބާ ޙަސަނެވެ. 21 އަހަރުން ދަށުގެ އެންމެ އުންމީދީ ކުޅުންތެރިޔަކަށް ފީއަލީ ކައުންސިލްގެ ޓީމުގެ ލީމް ޢަބްދުއްލަޠީފް ހޮވުނުއިރު، އެންމެ މޮޅު ކޯޗަކަށް ހޮވުނީ ދަރަނބޫދޫ ކައުންސިލް ޓީމުގެ ކޯޗު ޔޫސުފް މޫސާއެވެ.
މި މުބާރާތުގެ ފެއާޕްލޭ ޓީމަކަށް ހޮވިފައިވަނީ ނިލަންދޫ ކައުންސިލްގެ ޓީމެވެ. މި ޓީމަށް ތައްޓާއި ހަނދާނީ ލިއުން ޙަވާލު ކޮށްދެއްވީ ރިޔަލްޖާޒީގެ މާކެޓިންގ މެނޭޖަރ ވަޖީހު މޫސާއެވެ.
ޗެންޕިއަންކަން ހޯދި ދަރަނބޫދޫ ކައުންސިލްގެ ޓީމަށް ތައްޓާއި، މެޑަލްއާއި، -/20،000 ރުފިޔާގެ ފައިސާގެ އިނާމު ޙަވާލު ކޮށްދެއްވީ ފައިނަލް މެޗުގެ ޝަރަފްވެރި މެނުމާނު ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒެވެ. ރަނަރަޕް ކަން ހޯދި މަގޫދޫ ކައުންސިލްގެ ޓީމަށްވެސް ތައްޓާއި މެޑަލް އަދި -/10،000 ރުފިޔާގެ ފައިސާގެ އިނާމު ޙަވާލު ކޮށްދެއްވީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒެވެ.
2023 ވަނަ އަހަރުގެ ޗެންޕިއަން ޓީމަކީ މަގޫދޫ ކައުންސިލްގެ ޓީމެވެ. ފާއިތުވި އަހަރު ފައިނަލްގައި ވާދަކުރީ ފީއަލީ ކައުންސިލްގެ ޓީމާއި މަގޫދޫ ކައުންސިލްގެ ޓީމެވެ. ފާއިތުވި އަހަރުގެ މުބާރާތުގައި ރާއްޖެއިން ބޭރުގެ ކުޅުންތެރިންވެސް ކުޅެފައި ވެއެވެ.
