ނިލަންދެއަތޮޅު އުތުރުބުރީ އަތޮޅު ކައުންސިލްގެ މުވައްޒަފުންގެ މެދުގައި ޙަރަކާތްތަކެއް ކުރިއަށް ގެންދިއުން

ނިލަންދެއަތޮޅު އުތުރުބުރީ އަތޮޅު ކައުންސިލް އިދާރާގެ މުވައްޒަފުންގެ މެދުގައި އެކުވެރިކަން އާލާކޮށް މުވައްޒަފުންގެ މެދުގައި އޮންނަ ގުޅުންތައް ރަނގަޅު ކުރުމުގެ މަޤްޞަދުގައި މުވައްޒަފުންގެ މެދުގައި ޙަރަކާތްތަކެއް ކުރިއަށް ގެންގޮސްފިއެވެ.

28 އޮގަސްޓު 2024 އިން 30 އޮގަސްޓު 2024 އަށް ކުރިއަށް ގެންދިޔަ މި ޙަރަކާތް ކުރިއަށް ގެންގޮސްފައިވަނީ ނިލަންދެއަތޮޅު އުތުރުބުރީ އަތޮޅު ކައުންސިލްގެ މެންބަރުންނާއި އަތޮޅު ކައުންސިލް އިދާރާގެ ވެރިންނާއި މުވައްޒަފުން ދެ ގުރޫޕަކަށް ބަހާލައިގެންނެވެ. މިޙަރަކާތުގައި އަތޮޅު ކައުންސިލްގެ ހުރިހާ މެންބަރުންވެސް ބައިވެރިވެފައި ވެއެވެ.

ޓީމު މިޞްރާބާއި، ޓީމު ހުންގާނުގެ ނަމުން ނަންދެވިގެން ކުރިއަށް ގެންދިޔަ މި ޙަރަކާތުގައި ކުރިއަށް ގެންގޮސްފައިވަނީ އިޝާރާތް ޕްރޮގްރާމަކާއި، ހޭންޑްބޯލް މެޗަކާއި ފުޓްސަލް މެޗެކެވެ. ޓީމު މިޞްރާބުގެ ލީޑަރަކީ ލީގަލް އިފިސަރ ޙައްވާ އަނޫޝާއެވެ. ޓީމު ހުންގާނުގެ ލީޑަރަކީ އެސިސްޓެންޓް ކައުންސިލް އެގްޒެކެޓިވް ފަރީދާ އިބްރާހީމެވެ.

ކޮންމެ ޓީމެއްގައި 20 މީހުން ހިމަނައިގެން ކުރިއަށް ގެންދިޔަ މިޙަރަކާތުގައި އިޝާރާތް ޕްރޮގްރާމް ބާއްވާފައިވަނީ 28 އޮގަސްޓު 2024 ދުވަހުގެރޭ 20.15 ގައި ފ. އަތޮޅު ތަޢުލީމީ މަރުކަޒުގެ ޓީ.އާރު.ސީ ހޯލްގައެވެ. ޓީމު މިޞްރާބާއި ޓީމު ހުންގާނުގެ މެދުގައި ވަރަށް ފޯރިއާއެކު ކުރިއަށް ގެންދިޔަ އިޝާރާތް ޕްރޮގްރާމްގައި 37 ޕޮއިންޓު 10 ޕޮއިންޓުން ކުރިހޯދީ ޓީމު މިޞްރާބެވެ.

ދެ ޓީމުގެ އަންހެން މުވައްޒަފުންގެ މެދުގައި 29 އޮގަސްޓު 2024 ވަނަ ދުވަހުގެ ހަވީރު 4.30 ގައި ފ. ނިލަންދޫ ފުޓްސަލް ދަނޑުގައި ކުރިއަށް ގެންދިޔަ ހޭންޑްބޯލް މެޗުގައި ވަރަށްފޯރިގަދަ ކުޅުމަކަށްފަހު މެޗު ނިމިގެންދިޔައީ ޓީމު މިޞްރާބު މެޗު ކާމިޔާބު ކޮށްގެންނެވެ. ހޭންޑްބޯލް މެޗު ޓީމު މިޞްރާބުން ކާމިޔާބު ކޮށްފައިވަނީ 06 ލަނޑު 04 ލަނޑުންނެވެ.

އެންމެފަހު ކުޅިވަރު ކަމުގައިވާ ދެޓީމުގެ ފިރިހެން މުވައްޒަފުންގެ މެދުގައި 30 އޮގަސްޓު 2024 ވަނަ ދުވަހުގެ ހެނދުނު 7.00 ގައި ފ. ނިލަންދޫ ފުޓްސަލް ދަނޑުގައި ކުރިއަށް ގެންދިޔަ ފުޓްސަލްމެޗަކީވެސް ދެ ޓީމުގެ ދެމެދުގައި ވަރަށް ފޯރިއާއެކު ކުޅުނު މެޗެކެވެ. މި މެޗުވެސް ކާމިޔާބު ކޮށްފައިވަނީ 06 ލަނޑު 05 ލަނޑުން ޓީމު މިޞްރާބެވެ.

މި ޙަރަކާތްތައް ކުރިއަށް ގެންދިއުމުގައި ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސާއި، އަތޮޅު ކައުންސިލްގެ މެންބަރުންނާއި، ކައުންސިލް އިދާރާގެ އިދާރީ ވެރިންނާއި މުވައްޒަފުންގެ އެއްބާރުލުން ވަރަށް ބޮޑަށް ލިބިފައި ވެއެވެ.

މުވައްޒަފުންގެ ގުޅުން ރަގަނޅު ކުރުމަށް ކޮންމެ އަހަރަކު އަތޮޅު ކައުންސިލްގެ މުވައްޒަފުންގެ މެދުގައި ޙަރަކާތްތަކެއް ކުރިއަށް ގެންދެއެވެ. މި ޙަރަކާތުގެ ތެރޭގައި ހިމެނެނީ ކުޅިވަރު ޙަރަކާތްތަކާއި އަދަބީ ޙަރަކާތްތަކެވެ. އަދި މަސްދަތުރު ދިއުމާއި، ޕިކްނިކް ދަތުރުދިއުމަކީވެސް ކުރަމުން ގެންދާ ކަމެކެވެ. ހުރިހާ މުވައްޒަފުން ގުޅިގެން ކުރިއަށް ގެންދާ މި ޙަރަކާތްތަކުގެ ތެރެއިން މުވައްޒަފުންގެ މެދުގައި އޮންނަ ގުޅުންތައް ރަގަނޅު ވަމުން އަންނަކަން ފާހަގަ ކުރެވެއެވެ.