"ފާފު އެންމެ ސާފު" ޕްރޮގްރާމްގެ ދަށުން މިއަތޮޅު މަގޫދޫ ސާފުކުރުމުގެ މަސައްކަތް ކޮށްފި

ނިލަންދެއަތޮޅު އުތުރުބުރީ އަތޮޅު ކައުންސިލުން 2024 ވަނަ އަހަރު ކުރިއަށް ގެންދިއުމަށް ރާވާފައިވާ ޙަރަކާތުގެ ތެރޭގައި ހިމެނޭ "ފާފު އެންމެ ސާފު" ޕްރޮގްރާމްގެ ދަށުން މިއަތޮޅުގެ މީހުން ދިރިއުޅޭ ރަށްރަށް ސާފު ކުރުމުގެ މަސައްކަތް ފަށައިފިއެވެ.

މިއަތޮޅު މަގޫދޫގައި މި ޙަރަކާތް ފައްޓަވައި ދެއްވީ 19 އޮކްޓޫބަރު 2024 ވީ ހޮނިހިރު ދުވަހު ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒެވެ. މިއީ މި ޕްރޮގްރާމްގެ ދަށުން މިއަހަރު ސާފުކުރުމުގެ މަސައްކަތްފެށި ފުރަތަމަ ރަށެވެ.

ނިލަންދެއަތޮޅު އުތުރުބުރީ އަތޮޅު ކައުންސިލާއި، މިއަތޮޅު މަގޫދޫ ކައުންސިލާއި ގުޅިގެން ކުރިއަށް ގެންދިޔަ ސާފުކުރުމުގެ މިޙަރަކާތުގައި ފ. މަގޫދޫ ކައުންސިލާއި ފ. މަގޫދޫ މުވައްސަސާތަކުން ބައިވެރިވެފައި ވެއެވެ.

ސާފުކުރުމުގެ މި ޙަރަކާތުގައި ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒު ބައިވެރިވެ ވަޑައިގެން ޢަމަލީ ގޮތުން މަސައްކަތް ކުރައްވާފައި ވެއެވެ. އަތޮޅު ކައުންސިލްގެ ރައީސާއެކު އަތޮޅު ކައުންސިލުން 33 މުވައްޒަފުން ބައިވެރިވެފައި ވެއެވެ. މީގެއިތުރުން މަގޫދޫ ކައުންސިލާއި، މަގޫދޫގެ މުވައްސަސާ ތަކުން 150 އަށްވުރެ ގިނަ މީހުން ބައިވެރިވެފައި ވެއެވެ. މީގެ ތެރޭގައި މަގޫދޫ ސްކޫލްގެ ދަރިވަރުންވެސް ހިމެނެއެވެ.

މަގޫދޫ ސާފުކުމުގެ މަސައްކަތް ކުރިއަށް ގެންދިޔަ ބައިތަކުގެ ތެރޭގައި މަގޫދޫގެ ވަށައިގެން ގޮނޑުދޮށް ސާފުކުރުމާއި، ފުޓްބޯޅަ ދަނޑާއި، އިޖްތިމާޢީ އެކިއެކި ސަރަޙައްދުތައް ސާފުރުމުގެ މަސައްކަތް ކުރިއަށް ގެންދެވިފައި ވެއެވެ. ސާފުކުރުމުގެ މަސައްކަތުގެ އިތުރުން މަގޫދޫގެ އަތިރިމަތީގައި ރުއްއިންދުމުގެ ޕްރޮގްރާމެއްވެސް ކުރިއަށް ގެންދެވިފައި ވެއެވެ.

"ފާފު އެންމެ ސާފު" ޕްރޮގްރާމްގެ ދަށުން މީގެކުރިންވެސް ވަރަށްފޯރިއާއެކު ރަށްރަށް ސާފު ކުރުމުގެ މަސައްކަތް ކުރިއަށް ގެންދެވިފައި ވެއެވެ. އެކިއެކި ސަބަބުތަކާހުރެ މިޙަރަކާތް ކުރިއަށް ގެންދިއުން ދުވަސްތަކެއް ވަންދެން މެދިކެނޑިފައި އޮތުމަށްފަހު މިއަރުންފެށިގެން ކުރިއެކޭ ގޮތަށް މި ޕްރޮގްރާމް ކުރިއަށް ގެންދިއުމަށްވަނީ ނިންމާފައެވެ.

މި މަސައްކަތް ކުރިއަށް ގެންދިއުމުގައި ފ. މަގޫދޫ ކައުންސިލްގެ ނައިބް ރައީސާއި، ކައުންސިލް މެންބަރުންނާއި ކައުންސިލްގެ ވެރިންނާއި މުވައްޒަފުންގެ ފަރާތުން ވަރަށްބޮޑު އެއްބާރުލުމެއް ލިބިފައިވާކަން ފާހަގަ ކުރެވެއެވެ.