"ފާފު އެންމެ ސާފު" ޕްރޮގްރާމްގެ ދަށުން މިއަތޮޅު ބިލެއްދޫ ސާފުކުރުމުގެ މަސައްކަތް ކޮށްފި

"ފާފު އެންމެ ސާފު" ޕްރޮގްރާމްގެ ދަށުން މިއަތޮޅުގެ ބިލެއްދޫ ސާފުކުރުމުގެ މަސައްކަތް ކޮށްފިއެވެ.

ބިލެއްދޫ ސާފު ކުރުމުގެ މަސައްކަތް ކޮށްފައިވަނީ 26 އޮކްޓޫބަރު 2024 ވީ ހޮނިހިރު ދުވަހުއެވެ. މިއީ މި ޕްރޮގްރާމްގެ ދަށުން މިއަހަރު ސާފުކުރުމުގެ މަސައްކަތް ކުރި ދެވަނަ ރަށެވެ.

ނިލަންދެއަތޮޅު އުތުރުބުރީ އަތޮޅު ކައުންސިލާއި، މިއަތޮޅު ބިލެއްދޫ ކައުންސިލާއި ގުޅިގެން ކުރިއަށް ގެންދިޔަ ސާފުކުރުމުގެ މިޙަރަކާތުގައި ފ. ބިލެއްދޫ ކައުންސިލާއި، ބިލެއްދޫގެ މުވައްސަސާތަކުން ބައިވެރިވެފައި ވެއެވެ.

ބިލެއްދޫ ސާފުކުރުމުގެ މި ޙަރަކާތުގައި ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒާއި، އަތޮޅު ކައުންސިލްގެ ނައިބްރައީސް ޢަބްދުﷲ ވަޙީދާއި، ކައުންސިލްގެ މެންބަރު ޢަބްދުލް ޙަމީދު އާދަމާއި، ކައުންސިލް މެންބަރު މޫސާ އަޙްމަދު ބިލެއްދޫއަށް ވަޑައިގެން ޢަމަލީ ގޮތުން މަސައްކަތް ކުރައްވާފައި ވެއެވެ.

އަތޮޅު ކައުންސިލް މެންބަރު އަރީޙް އިސްމާޢީލަކީ ބިލެއްދޫ ކައުންސިލްގެ ރައީސް ކަމަށްވާތީ، މި މަސައްކަތުގައި އަރީޙް އިސްމާޢީލް ބައިވެރިވެ ވަޑައިގެންފައިވަނީ ބިލެއްދޫ ކައުންސިލްގެ ރައީސްގެ ޙައިޘިއްޔަތުންނެވެ.

އަތޮޅު ކައުންސިލްގެ ރައީސާއި އަތޮޅު ކައުންސިލްގެ މެންބަރުން ހިމެނޭގޮތަށް އަތޮޅު ކައުންސިލުން 40 މުވައްޒަފުން ބައިވެރިވެފައި ވެއެވެ. މީގެއިތުރުން ބިލެއްދޫ ކައުންސިލާއި، ބިލެއްދޫގެ މުވައްސަސާތަކުން 100 އަށްވުރެ ގިނަ މުވައްޒަފުން ބައިވެރިވެފައި ވެއެވެ.

ބިލެއްދޫގައި ކުރިއަށް ގެންދިޔައީ ބިލެއްދޫ ގޮޑުދޮށް ސާފު ކުރުމުގެ މަސައްކަތެވެ. ގޮނޑުދޮށް ސާފުކުރުމަށް ކުރެވުނު މަސައްކަތުން ގޮނޑުދޮށުގައި ހުރި ޕްލާސްޓިކްގެ ބާވަތްތަކާއި ދަގަނޑުގެ ބާވަތްތައް ނަގައި ސާފުކުރުމުގެ މަސައްކަތް ކުރިއަށް ގެންދެވިފައި ވެއެވެ.

މި މަސައްކަތް ކުރިއަށް ގެންދިއުމުގައި ފ. ބިލެއްދޫ ކައުންސިލްގެ ރައީސާއި، ކައުންސިލް މެންބަރުންނާއި ކައުންސިލްގެ ވެރިންނާއި މުވައްޒަފުންގެ ފަރާތުން ވަރަށްބޮޑު އެއްބާރުލުމެއް ލިބިފައިވާކަން ފާހަގަ ކުރެވެއެވެ.