ފ. އަތޮޅު ޤުރްއާން މުބާރާތުން އެއްވަނަ ފ. އަތޮޅު މަދަރުސާގެ ދަރިވަރު ޢާއިޝަތު ޔާނާ އަޙްމަދަށް

ނިލަންދެއަތޮޅު އުތުރުބުރީ އަތޮޅު ކައުންސިލުން އިންތިޒާމް ކޮށްގެން މިއަތޮޅުގެ ސްކޫލްތަކަށް ހުޅުވާލައިގެން 2024 އޮކްޓޫބަރު 31 އިން ނޮވެންބަރު 02 އަށް ފ. ނިލަންދޫގައި ބޭއްވި "ފ. އަތޮޅު ޤުރުއާން މުބާރާތް 2024" ގެ ފަޚްރުވެރި އެއްވަނަ ފ. އަތޮޅު މަދަރުސާގެ ދަރިވަރު ޢާއިޝަތު ޔާނާ އަޙްމަދު ހޯދައިފިއެވެ.

މިއީ ފ. އަތޮޅު ޤުރުއާން މުބާރާތުން ވިދިވިދިގެން ޢާއިޝަތު ޔާނާ އަޙްމަދު އެއްވަނަ ހޯދި ތިންވަނަ ފަހަރެވެ.

2022 ވަނަ އަހަރު ފ. ނިލަންދޫގައި ބޭއްވި ޤުރުއާން މުބާރާތުން އެއްވަނަ، 2023 ވަނަ އަހަރު ފ. މަގޫދޫގައި ބޭއްވި ޤުރުއާން މުބާރާތުން އެއްވަނަ އަދި 2024 ވަނަ އަހަރު ފ. ނިލަންދޫގައި ބޭއްވި ޤުރުއާން މުބާރާތުން އެއްވަނަ ހޯދުމުގެ އިތުރުން 2019 ވަނަ އަހަރު ފ. ދަރަނބޫދޫގައި ބޭއްވި ޤުރުއާން މުބާރާތުންވެސް ޔާނާ އަޙްމަދުވަނީ އެއްވަނަ ހޯދާފައެވެ.

މި މުބާރާތުގެ ނަތީޖާ ފާޅުމުގެ ރަސްމިއްޔާތު ބާއްވާފައިވަނީ 2024 ނޮވެންބަރު 02 ވަނަ ދުވަހުގެ 13.00 ގައި ފ. އަތޮޅު ތަޢުލީމީ މަރުކަޒުގައެވެ. ޤުރުއާނުގެ ބަރާކާތުން ފ. ބިލެއްދޫ ސްކޫލްގެ ދަރިވަރު ސިތާމް މުޙައްމަދު ޝިޔާމު ފަށައިދިން މި ރަސްމިއްޔާތު ޝަރަފްވެރި ކޮށްދެއްވީ ފ. އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒެވެ. މި ރަސްމިއްޔާތުގައި ފ. އަތޮޅު ކައުންސިލްގެ މެންބަރުންނާއި، ސްކޫލްތަކުގެ ޕްރިންސިޕަލުންނާއި، އަތޮޅު ކައުންސިލްގެ އިސް ވެރިންނާއި ފ. ނިލަންދޫގެ ދާއިރާތަކުގެ ވެރިންނާއި މުބާރާތުގައި ބައިވެރިވި ދަރިވަރުންނާއި ބެލެނިވެރިން ބައިވެރި ވެފައި ވެއެވެ.

2024 ވަނަ އަހަރު ބޭއްވި ފ. އަތޮޅު ޤުރުއާން މުބާރާތުން ފަޚްރިވެރި 01 ވަނަ ހޯދާފައިވަނީ ފ. އަތޮޅު މަދަރުސާގެ ދަރިވަރު ޢާއިޝަތު ޔާނާ އަޙްމަދެވެ. 02 ވަނަ ހޯދާފައިވަނީ ފ. އަތޮޅު ތަޢުލީމީ މަރުކަޒުގެ ދަރިވަރު ޝަޔާން އަޙްމަދު ރަޝީދެވެ. 03 ވަނަ ހޯދާފައިވަނީ ފ. އަތޮޅު ތަޢުލީމީ މަރުކަޒުގެ ދަރިވަރު ފާޠިމަތު އަމްނާ ޢަބްދުﷲ އެވެ.

މި މުބާރާތުން 01 ވަނަ ސްކޫލަކަށް ހޮވިފައިވަނީ ފ. އަތޮޅު ތަޢުލީމީ މަރުކަޒެވެ. 02 ވަނަ ސްކޫލަކަށް ހޮވިފައިވަނީ ފ. ބިލެއްދޫ ސްކޫލެވެ. 03 ވަނަ ހޯދާފައިވަނީ ފ. އަތޮޅު މަދަރުސާއެވެ.

މި މުބާރާތުގެ ބަލައިގެން ކިޔެވުމުގެ ގޮފިން 01 ވަނަ ހޯދާފައިވަނީ ފ. އަތޮޅު މަދަރުސާގެ ދަރިވަރު ޢާއިޝަތު ޔާނާ އަޙްމަދެވެ. 02 ވަނަ ހޯދާފައިވަނީ ފ. އަތޮޅު ތަޢުލީމީ މަރުކަޒުގެ ދަރިވަރު ފާޠިމަތު އަމްނާ ޢަބްދުﷲ އެވެ. 03 ވަނަ ހޯދާފައިވަނީ ފ. ބިލެއްދޫ ސްކޫލްގެ ދަރިވަރު ޢާއިޝަތު ރައުޝަން ރަމީޒެވެ.

ބަލައިގެން ކިޔެވުމުގެ ގޮފިން 01 ވަނަ ސްކޫލަށް ހޮވިފައިވަނީ ފ. އަތޮޅު ތަޢުލީމީ މަރުކަޒެވެ. 02 ވަނަ ސްކޫލަކަށް ހޮވިފައިވަނީ ފ. ބިލެއްދޫ ސްކޫލެވެ. 03 ވަނަ ސްކޫލަކަށް ހޮވިފައިވަނީ ފ. މަގޫދޫ ސްކޫލެވެ.

މި މުބާރާތުގެ ނުބަލައި ކިޔެވުމުގެ ގޮފިން 01 ވަނަ ހޯދާފައިވަނީ ފ. އަތޮޅު ތަޢުލީމީ މަރުކަޒުގެ ދަރިވަރު ޝަޔާން އަޙްމަދު ރަޝީދެވެ. 02 ވަނަ ހޯދާފައިވަނީ ފ. ދަރަނބޫދޫ ސްކޫލްގެ ދަރިވަރު ޢިޝާ އަޙްމަދެވެ. 03 ވަނަ ހޯދާފައިވަނީ ފ. އަތޮޅު މަދަރުސާގެ ދަރިވަރު ރުޚާއު ރިފްޢަތު މުޙައްމަދެވެ.

ނުބަލައި ކިޔެވުމުގެ ގޮފިން 01 ވަނަ ސްކޫލަށް ހޮވިފައިވަނީ ފ. އަތޮޅު ތަޢުލީމީ މަރުކަޒެވެ. 02 ވަނަ ސްކޫލަކަށް ހޮވިފައިވަނީ ފ. ބިލެއްދޫ ސްކޫލެވެ. 03 ވަނަ ސްކޫލަކަށް ހޮވިފައިވަނީ ފ. އަތޮޅު މަދަރުސާއެވެ.

2024 ވަނަ އަހަރުގެ ޤުރުއާން މުބާރާތުގައި ބައިވެރިވެފައިވަނީ ޖުމްލަ 86 ދަރިވަރުންނެވެ. އެއީ 56 އަންހެން ދަރިވަރުންނާއި، 30 ފިރިހެން ދަރިވަރުންނެވެ. ބަލައިގެން ކިޔެވުމުގެ ގޮފީގައި ބައިވެރި ވެފައިވަނީ 48 ދަރިވަރުންނެވެ. ނުބަލައި ކިޔެވުމުގެ ގޮފީގައި ބައިވެރިވެފައިވަނީ 38 ދަރިވަރުންނެވެ.

ފ. އަތޮޅު ޤުރުއާން މުބާރާތުން 01 ވަނައަށް ދިޔަ ފ. އަތޮޅު ތަޢުލީމީ މަރުކަޒަށް -/10،000 ރުފިޔާ، 02 ވަނައަށް ދިޔަ ފ. އަތޮޅު މަދަރުސާއަށް -/7،000 ރުފިޔާ އަދި 03 ވަނައަށް ދިޔަ ފ. ބިލެއްދޫ ސްކޫލަށް -/5،000 ރުފިޔާގެ ފައިސާގެ އިނާމު ނިލަންދެއަތޮޅު އުތުރުބުރީ އަތޮޅު ކައުންސިލުން ދީފައި ވެއެވެ.

އަދި ޤުރުއާން މުބާރާތުގެ ދެ ގޮފީގައި ހިމެނޭ 01 ވަނަ 02 ވަނަ އަދި 03 ވަނައަށް ދިޔަ ދަރިވަރުންނަށާއި، މުޅި މުބާރާތުން 01 ވަނަ 02 ވަނަ އަދި 03 ވަނައަށް ދިޔަ ދަރިވަރުންނަށްވެސް ނިލަންދެއަތޮޅު އުތުރުބުރީ އަތޮޅު ކައުންސިލުން ހުށަހަޅާފައިވާ ފައިސާގެ އިނާމުވެސް މިރަސްމިއްޔާތުގައި އެ ދަރިވަރުންނާއި ޙަވާލު ކޮށްފައި ވެއެވެ.

މި އަހަރުގެ މުބާރާތުން އެއްވަނައަށް ދިޔަ ދަރިވަރު ޢާއިޝަތު ޔާނާ އަޙްމަދަށް އަތޮޅު ކައުންސިލުން ދޭ އިނާމުގެ އިތުރުން ފަރީ ޙައްޖު އެންޑް ޢުމުރާ ގުރޫޕުން ހުށަހަޅާފައިވާ ޢުމްރާ ދަތުރުގެ ލިއުންވެސް މި ރަސްމިއްޔާތުގައި އެ ދަރިވަރާއި ޙަވާލުކޮށްފައި ވެއެވެ. މި ލިއުން އެ ދަރިވަރިވަރާއި ޙަވާލު ކޮށްދެއްވީ ފ. އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒެވެ.