"ފާފު އެންމެ ސާފު" ޕްރޮގްރާމްގެ ދަށުން މިއަތޮޅު ދަރަނބޫދޫ ސާފުކުރުމުގެ މަސައްކަތް ކޮށްފި

"ފާފު އެންމެ ސާފު" ޕްރޮގްރާމްގެ ދަށުން މިއަތޮޅު ދަރަނބޫދޫ ސާފުކުރުމުގެ މަސައްކަތް ކޮށްފިއެވެ.

ދަރަނބޫދޫ ސާފު ކުރުމުގެ މަސައްކަތް ކޮށްފައިވަނީ 09 ނޮވެންބަރު 2024 ވީ ހޮނިހިރު ދުވަހުއެވެ. މިއީ މި ޕްރޮގްރާމްގެ ދަށުން މިއަހަރު ސާފުކުރުމުގެ މަސައްކަތް ކުރި ތިންވަނަ ރަށެވެ.

ނިލަންދެއަތޮޅު އުތުރުބުރީ އަތޮޅު ކައުންސިލާއި، ދަރަނބޫދޫ ކައުންސިލާއި ގުޅިގެން ކުރިއަށް ގެންދިޔަ ސާފުކުރުމުގެ މިޙަރަކާތުގައި ދަރަނބޫދޫ ކައުންސިލާއި، ދަރަނބޫދޫގެ މުވައްސަސާތަކުން ބައިވެރިވެފައި ވެއެވެ.

ދަރަނބޫދޫ ސާފުކުރުމުގެ މި ޙަރަކާތުގައި ނިލަންދެއަތޮޅު އުތުރުބުރީ އަތޮޅު ކައުންސިލްގެ ރައީސް ޙައްވާ ޢަބްދުލް ޢަޒީޒާއި، އަތޮޅު ކައުންސިލްގެ ނައިބްރައީސް ޢަބްދުﷲ ވަޙީދު، ދަރަނބޫދޫއަށް ވަޑައިގެން ޢަމަލީ ގޮތުން މަސައްކަތް ކުރައްވާފައި ވެއެވެ.

އަތޮޅު ކައުންސިލް މެންބަރު ޢަބްދުލް ޙަމީދު އާދަމަކީ ދަރަނބޫދޫ ކައުންސިލްގެ ރައީސް ކަމަށްވާތީ، މި މަސައްކަތުގައި ޢަބްދުލް ޙަމީދު އާދަމް ބައިވެރިވެ ވަޑައިގެންފައިވަނީ ދަރަނބޫދޫ ކައުންސިލްގެ ރައީސްގެ ޙައިޘިއްޔަތުންނެވެ. މި މަސައްކަތުގައި ޢަބްދުލް ޙަމީދު އާދަމް ބައިވެރިވެ ވަޑައިގަންނަވައި ޢަމަލީ ގޮތުން މަސައްކަތް ކުރައްވާފައި ވެއެވެ.

އަތޮޅު ކައުންސިލްގެ ރައީސް ހިމެނޭގޮތަށް އަތޮޅު ކައުންސިލުން 25 މުވައްޒަފުން ބައިވެރިވެފައި ވެއެވެ. މީގެއިތުރުން ދަރަނބޫދޫ ކައުންސިލާއި، ދަރަނބޫދޫގެ މުވައްސަސާތަކުން 100 އަށްވުރެ ގިނަ މުވައްޒަފުން ބައިވެރިވެފައި ވެއެވެ. މުވައްސަސާތަކުން ބައިވެރިވި މުވައްޒަފުންގެ އިތުރުން މި މަސައްކަތުގައި ދަރަނބޫދޫ ސްކޫލްގެ 150 ކުދިން ބައިވެރިވެފައި ވެއެވެ.

ދަރަނބޫދޫގައި ކުރިއަށް ގެންދިޔައީ ދަރަނބޫދޫގެ ވަށައިގެން ގޮނޑުދޮށް ސާފު ކުރުމުގެ މަސައްކަތެވެ. ގޮނޑުދޮށް ސާފުކުރުމަށް ކުރެވުނު މަސައްކަތުން ގޮނޑުދޮށުގައި ހުރި ޕްލާސްޓިކްގެ ބާވަތްތަކާއި ދަގަނޑުގެ ބާވަތްތަކުގެ އިތުރުން ގޮނޑުދޮށުގައި ހުރި ކުނިތައް ނަގައި ސާފުކުރުމުގެ މަސައްކަތް ކުރެވިފައި ވެއެވެ. މި މަސައްކަތުން 14 ޖަންބޯގެ ކުނި ނެގިފައި ވެއެވެ.

މި މަސައްކަތް ކުރިއަށް ގެންދިއުމުގައި ފ. ދަރަނބޫދޫ ކައުންސިލްގެ ރައީސާއި، ކައުންސިލް މެންބަރުންނާއި ކައުންސިލްގެ ވެރިންނާއި މުވައްޒަފުންގެ ފަރާތުން ވަރަށްބޮޑު އެއްބާރުލުމެއް ލިބިފައިވާކަން ފާހަގަ ކުރެވެއެވެ.